【經驗分享】開咖啡店有咩要知？｜開咖啡店心得Q&A系列(三)｜Reeves @ Hands-on Coffee, Hare晴舍, Chokohood精品朱古力café
「永遠有野係人地做唔到但你做到，所以開店一定要清楚自己有咩專長、想打入咩市場。」
開咖啡店心得Q&A嘅第三彈我哋訪問咗Hands-on Coffee嘅Reeves，佢已經有多年豐富咖啡師同餐飲管理經驗，除左喺旺角嘅hands-on coffee之外，嚟緊都準備喺佐敦開日式餐廳Hare晴舍同喺大坑開Chokohood精品朱古力café，佢仲經營緊本地咖啡烘焙廠Coffee Engineering 添，絕對值得想開咖啡店嘅你睇下有咩可以取經！
＃籌備
籌備要用幾耐？
籌備過程包括對店鋪同品牌嘅構思、裝修、電器、儀器等等，籌備時間視乎情況而定，並冇一個充足嘅定義，我自己用左3個月左右。
要用幾多錢 ?
視乎租金、店舖定位同裝修風格而定，以800-1000呎約20座位嘅規模為例，籌備保守要港幣120萬以上。
籌備期間會有咩困難？
- 如果係有合作伙伴嘅話，有機會會同伙伴有意見分歧，需要用心花時間達成同合作伙伴達成共識。
- 如果冇充足資金嘅話，籌備期間會有好多限制，未必可以將內心所想實現到。
- 要認清自己想做啲咩，需要時間思考店舖嘅定位。
- 無論係咩行業，喺請人上都會有困難，要請到人難，要請到合適嘅人更難。
依家資訊咁流通，亦多左人想做咖啡，點解依然覺得請人難？
大家普遍都會覺得飲食業喺香港唔算係一個高尚嘅職業，門檻較低，收入唔高但工作比較辛苦，工時亦比較長。另一方面，以前咖啡呢一行較少人認識，雖然人才會較少，但比較容易搵啱，浮動性相比依家較小。而依家對咖啡師需求大咗，咖啡師本身亦會挑選適合自己嘅咖啡店變相較難請人。
請人大概要幾耐？
都好睇彩數，一般情況而言預留3個星期會較好。
租鋪之前有咩要留意？
一定要確保自己清楚店鋪有冇問題或所有潛在危機後先好落決定租鋪。喺租之前要搵一個信得過嘅牌照顧問幫你檢查清楚。
除左籌備期間嘅資金外，仲要保底留幾多資金？
視乎情況而定，有啲人留三個月嘅資金、有啲人留半年嘅資金，但至少要保留頭兩個月嘅租金同人工。
「如果連諗自己想要咩咖啡豆或咖啡機都有困難，就要審視下自己係咪真係想做呢行」
正常嚟講想開咖啡店嘅人都大概知道自己想要咩咖啡豆同咖啡機，如果你喺呢方面都覺得有困難，就需要諗下自己係咪真係想做同啱做。
＃想賺大錢一定唔係開咖啡店
當問到點樣盡量做到收支平衡，Reeves提到「想賺大錢一定唔係靠開咖啡店」，亦認為點達到收支平衡視乎店主嘅預期。香港地方細且人口密集，香港人都會想繁忙期間搵地方抖下，所以只要咖啡店有心做、清楚自己目標同定位，就唔會太差。
淨係做精品咖啡做唔做得住？
「永遠有野係人地做唔到但你做到」
現今咖啡店數量泛濫，開店一定要清楚自己有咩專長同特性。清楚自己嘅概念想打入咩市場、適唔適合某地區同某時期，永遠有野係人地做唔到但你做到，所以冇話做唔做得住，最緊要有信心。
有冇話一定要做多啲野食先好？
視乎店主自己想做啲咩，呢方面應該要開店前已經構思好，如果去到開左店試完先想臨時再大改，好大機會係垂死掙扎。
點樣留住客人？
視乎唔同咖啡店嘅風格，有啲店舖可能會有定期試啡活動、有啲店舖會有會員制或VIP制，但呢啲做咗未必會好啲、亦未必唔得，好難講。但最重要係做好自己、保持好質素。
＃炒豆先定開店先？
首先要清楚「開炒豆房同開咖啡店完全係兩個唔同嘅行業」，需要嘅技術同概念都完全唔同，好難相提並論。
炒豆房會相對上易start-up，只要有設備，自己一個人都可以handle到。但難啲持續同擴展，炒豆房要搵到好嘅客會相對困難，再加上大家比較鍾意新事物，未必有人會鍾意一直只用一間廠。
開咖啡店更容易有客人接觸，賺錢會比做炒豆相對容易，亦因為可以更直接咁接觸客人，所以更容易將自己想傳遞嘅訊息傳遞出去。
可能有人係想開店但因為唔夠資金而開左炒豆房先。
＃咖啡機推介
市面上咖啡機好多，要視乎預算而定。但未必一定要買好貴，貴嘅可能好靚好多功能，但如果唔識用比較pro嘅function，只係當普通咖啡機咁用其實都冇咩意思。最緊要適合自己同CP值較高。
以下推介3款唔同類型嘅咖啡機比大家：
- 單頭商用咖啡機：Victoria Arduino Eagle One
>>參考網頁<< - 實惠之選雙頭/三頭商用咖啡機：La Marzocco Linea Classic
>>參考網頁<< - 進階商用咖啡機：Synesso MVP HYDRA
>>參考網頁<<
＃最後有咩建議比想開咖啡店嘅人？
雖然依家咖啡店熱潮正盛，但記住唔好預開咖啡店可以賺大錢，亦唔好太理想化，有時候將興趣發展成事業唔一定係好事，要諗清楚自己想要啲咩，係純粹鍾意咖啡定鍾意飲食業。
本篇內容在訪問後進行了多次整理，資料僅供參考，如有不足的地方，請多多包涵。
想創業開咖啡店但喺開戶口上有困難？
即刻睇睇eCup為你爭取嘅專屬開戶優惠！>>>開銀行戶口優惠<<<
開戶後如果想招聘人手，歡迎前往 >>>咖啡店職缺<<< 留低你嘅招聘訊息。
繼續睇 開咖啡店心得Q&A系列 其他文章：
