【經驗分享】開咖啡店有咩要知？｜開咖啡店心得Q&A系列(四)｜Gary @ Rings Coffee
「你嘅第一份menu一定要將自己鍾意嘅同想做嘅嘢放左落去先，然後客人會話比你知你想做嘅野好唔好或者適唔適合。」
開咖啡店心得Q&A系列嘅最後一彈訪問咗Rings Coffee嘅Gary，Rings Coffee除咗喺九龍城有地鋪總店之外，喺D2 Place 4樓盡頭都有一個咖啡bar形式嘅小店。無論你係打算進駐地鋪定喺商場開咖啡店，佢嘅經驗都一定可以幫你喺到搵到可供你參考嘅資訊。快啲睇落去啦！
＃籌備
籌備兩間店分別用左幾耐？
總店規模大概1000呎，可容納30人，大概籌備咗半年至一年時間。而D2place嘅鋪就籌備左大概兩個月。
用左幾多錢？
總店大概200萬內，而D2鋪大概2-30萬。
開咖啡店喺選址方面有咩考慮？
首先要諗嘅就係人流，如果人流太旺租金會比較貴，對咖啡店嚟講負擔會較大。我會選擇喺大街再隔兩條橫街嘅位置開咖啡店。一方面大家入咖啡店都係想放鬆下，如果揀大街嘅話，嘈雜嘅環境可能會對客人造成困擾。另一方面係即使隔左兩條橫街對客人嚟講都尚算方便。
租鋪之前有咩要留意？
決定租鋪之前一定要親身去睇，檢查清楚牆、柱、消防通道等等。以我之前租鋪為例，睇鋪嘅時候發現有一面牆長年滲水，所以就入紙去地政署申請加多一面牆去封左佢。其實好多問題都有方法解決，但一定要清楚店鋪嘅情況同衡量想要啲咩先落決定。
進駐商場同地鋪有咩唔同？
- 商場部分店鋪未必有水電，雖然都可以將無變成有，但會較為繁複。
- 部分商場需要店鋪配合裝修同定位，未必可以完全按照自己嘅理念設計。
- 部分商場可能喺開放時間同員工人數上有規定。
- 部分商場可能需要店鋪跑數，跑唔夠數嘅話需要比罰金。
唔同類型嘅業主有咩分別？
私人業主一般嚟講溝通上會容易啲；銀行業主手續可能會比較繁複，或者等耐啲；而公司業主可能商業成份會多啲。
除左籌備期間嘅資金外，仲要保底留幾多資金？
預留3個月嘅租金同人工會相對穩陣啲。
＃定位
Menu
「你嘅第一份menu一定要將自己鍾意嘅同想做嘅嘢放左落去先，然後客人會話比你知你想做嘅野好唔好或者適唔適合。」
但同時都要注意唔好放太多嘢落第一份menu到，亦唔好為左迎合市場而刻意做自己唔鍾意嘅嘢。雖然有部份item始終都有需要為滿足市場需求而放入menu到，但一定要自己平衡好比重，唔好為迎合而令自己太過唔開心。
除咗放自己鍾意嘅嘢落menu之外，仲要理解你開店嘅區域嘅客人鍾意啲咩，因為每個區都會有自己嘅特色，同一份menu喺唔同區會有唔同效果，可以好大分別。
定價
定價並非劃一標準，例如唔好因為某一件成本佔20-25%然後全部產品都定20-25%。總有部分產品要為市場需求而調整價錢，要識得平衡。一定會有產品係幫唔到你賺錢但會幫到你塑造品牌特點。
＃關於咖啡豆供應
如果自己冇炒豆嘅話，喺經營上會有咩困難？
- 冇得自己掌控好咖啡豆嘅品質
- 貨期冇得彈性配合自己咖啡店，如果店鋪突然好旺嘅話可能會有嗌唔切豆嘅情況出現。
- 喺價錢方面可能要硬食貴價。
- 當轉供應商時店鋪同客人都要重新適應新嘅咖啡豆。
- 好難因應實際情況對咖啡豆作出調整。
- 錯貨或漏貨嘅機率大咗。
炒豆先定開店先？
視乎你想做啲咩。其實前期投入開咩都貴，但炒豆房喺成本上可以控制得更好，因為生咖啡豆成本比熟咖啡豆平太多。
如果兩樣都想做嘅話，開咖啡店先會比較穩陣。因為要有客源先會支持到炒豆房，炒豆要搵客嘅話相對比較難搵長期合作對象，所以一開始會較難有穩定收入。相反，開咖啡店比較容易接觸到客人，更重要嘅係買咖啡嘅人一定比買咖啡豆嘅人多。
＃做精品咖啡係咪要有埋野食？
「唔好忽略人可以有一日唔飲咖啡，但冇一日可以唔食飯」
明白有部分咖啡師只想做好精品咖啡嘅心情，但想做好精品咖啡首先要令更多人接觸精品咖啡。我地可以做嘅就係用客人鍾意嘅野吸引佢哋，然後將我哋鍾意嘅精品咖啡推介比佢哋。
「未必會有人特登去偏遠地方淨係飲一杯咖啡，但總會有人願意去偏遠地方食一餐飯再順便飲一杯咖啡先走。」
所以我哋更加唔應該抗拒，而係諗方法推廣，吸引客人接觸精品咖啡，咁先更容易將我哋想傳遞嘅嘢傳遞開去。
當然，如果你本身唔鍾意嘅，都唔好逼自己做唔想做嘅事。
淨係做精品咖啡做唔做得住？
其實都好視乎情況同點切入市場，最緊要係自己鍾意做、有信心同有實力。
＃請人上有冇困難？
近期增加左好多咖啡店，但其實咖啡師冇咁多，變相依家請人難咗好多，而且挖角、格價等等情況開始出現。如果係新入行嘅人，本身冇人脈嘅話，就可能需要出更高嘅價錢先請到咖啡師。
＃做左老闆之後心態上有咩唔同？
以前做咖啡師嘅時候沖得唔好或者有咩唔明都可以問人，但做左老闆之後唔會再有人教你，變相要自己不停判斷自己沖得夠唔夠好、有冇退步到，壓力會大咗好多。所以我間唔中會約返以前啲師兄弟姊妹一齊沖咖啡嚟確保自己有冇退步。
另一方面，以前淨係會諗自己做得好唔好，依家會諗埋自己嘅團隊做得好唔好，亦會想做更多去令團體嘅整體表現提升。
會唔會覺得做咗老闆之後捨棄咗做咖啡師嘅感覺？
其實好多時咖啡師鍾意嘅未必係一次過沖好多杯咖啡比人，而係享受沖一杯好咖啡嘅過程。再加上做左老闆之後會帶領自己嘅團隊，當自己帶領嘅團隊有進步或者做得好，嗰種感受係比自己沖一杯好嘅咖啡更加滿足。
擴展業務有咩困難？
- 客群會轉，跟住你走嚟走去嘅客人唔多。
- 資金 – 夠唔夠資金可以開完分店之後確保到收支平衡？
- 依家咖啡店太多，而擴展意味住需要更多人手，請人更加難。
- 咖啡店有啲泛濫，如果業主知道你想開咖啡店嘅話，有機會會收貴啲。
- 同區競爭比以前嚴重咗，變相要經營都困難咗。
＃咖啡機/磨豆機推介
現階段嚟講咖啡機性能都差唔多，只要提供到穩定嘅壓力就足夠。
小富士R-220：
比較適合沖虹吸式咖啡，R-220使用鬼齒刀，相比起平刀，鬼齒刀切割後有更多棱角，可以喺煮虹吸式咖啡嘅時候有更多唔同嘅味道。
>>參考網頁<<
＃最後有咩建議比想開咖啡店嘅人？
「如果想承住熱潮加入咖啡圈，想喺浪潮之中站穩腳，就要有自己嘅特色。」
其實依家處於一個比較特別嘅時期，正常嚟講香港唔會有咁多人飲咖啡，飲咖啡嘅增長幅度冇大家想像中咁高。之所以最近咁多咖啡店興起，一方面係因為疫情令大家困住喺一個地方，大家更想休息。另一方面係大勢所趨，令技術已經成熟嘅咖啡師選擇喺近呢兩年開咖啡店，呢一班咖啡師有一定嘅實力，即使過咗熱潮都唔會被捲走。
如果想承住熱潮，喺呢段時間加入咖啡圈成為一份子嘅話，就要好好裝備自己嘅團隊。無論係裝修、產品款式、質量定係服務，想係浪潮之中站穩腳，就要有自己嘅特色。
開關之後本地客群或可能會回落，但又會有新嘅外地客人，所以如果想開鋪，就要清楚自己嘅目標客群係邊班人，重點出擊，先有更好嘅成效
IG @ringscoffee
本篇內容在訪問後進行了多次整理，資料僅供參考，如有不足的地方，請多多包涵。
想創業開咖啡店但喺開戶口上有困難？
即刻睇睇eCup為你爭取嘅專屬開戶優惠！>>>開銀行戶口優惠<<<
開戶後如果想招聘人手，歡迎前往 >>>咖啡店職缺<<< 留低你嘅招聘訊息。
