【手沖咖啡入門】蛋糕模都可以做濾杯!? 6款手沖濾杯指南!
我地上一篇文介紹咗5種簡單家用沖咖啡方法，其實Home Brew一啲都唔難！只要揀啱適合嘅沖法同器材，就可以慢慢調整比例，沖出一杯最啱自己口味嘅咖啡。
講到咖啡器材嘅種類真係數都數唔曬，每一種沖煮法都會有各種獨特嘅器材，佢地嘅用法同原理都唔同，睇到頭都暈！我地搜羅咗6款比較常見嘅手沖濾杯，簡單介紹下佢地嘅用法同特色，對新手入門或者想嘗試新濾杯嘅你都一定有幫助！
① HARIO V60 Dripper
Photo by Maria Orlova from Pexels
HARIO呢款V60 Dripper好可能係最多人選用嘅濾杯，唔少人新手入門嘅時候第一隻濾杯就係V60，到底佢有咩魅力吸引咁多用家買呢？
V60呢個產品名來自佢60°內角嘅設計，令水流更容易集中喺濾杯中心，加上底部出水孔較大，可以提高用家嘅操作空間，透過控制注水量改變流速。最獨特嘅就係內層螺絲形嘅坑紋設計，喺沖煮過程幫助咖啡粉排出氣體，釋放咖啡豆風味。因為V60有高自由度，沖出嚟嘅咖啡風味上亦比較客易調整，所以非常適合入門！
Photo by Cup of Couple from Pexels
HARIO V60 Coffee Dripper 01 ($128)
② CAFEC DEEP45 Dripper
Photo from CAFEC
而DEEP45顧名思義有45度內角嘅深角度設計，令咖啡粉層更厚，過濾嘅時候熱水同咖啡粉接觸嘅時間會增加，所以能夠萃取出更多咖啡風味。
DEEP45內層有兩種坑紋，濾杯上半部由一排凸出嘅圓點狀紋路組成，配合六角形設計，令濾紙同濾杯之間接觸面增加，但仍有足夠距離俾空氣釋放出嚟；下半部到出水口有直線坑紋，用意係加快咖啡喺濾杯底部嘅流速，即使濾杯深度高都唔會過度萃取！
Photo from CAFEC
Simplii Yours ---- CAFEC DEEP45 Dripper ($299)
③ 聰明濾杯 (Clever Dripper)
由台灣首創嘅聰明濾杯以佢革新嘅原理改變大家對手沖咖啡嘅認知，呢款濾杯底部嘅止水閥可以將熱水暫時留喺濾杯入面，用浸泡嘅方式萃取咖啡，之後放喺容器上面就會自動打開水閘，熱水流通嘅同時進行過濾。
正因為聰明濾杯主要以浸泡方式沖出咖啡風味，並唔似其他濾杯咁需要一定技巧。只需要計好水粉比同控制浸泡時間，就可以好輕鬆咁沖出一杯味道平衡嘅咖啡，品質亦都非常穩定，沖咖啡經驗較少嘅新手可以由聰明濾杯開始上手！
④ Chemex
Photo by Cottonbro from Pexels
驟眼睇可能以為佢係實驗室用嚟溝Chemical嘅玻璃樽，但其實佢都係一種手沖器材！Chemex比起濾杯更加似濾壺，全玻璃製嘅壺身配上沙漏型嘅細腰設計，美感度簡直爆棚。
同常見嘅濾杯唔同，Chemex冇各式各樣嘅內層坑紋幫助疏導空氣同加快流速，只有一條從壺腰連通壺嘴嘅排氣道，亦都作為Chemex嘅倒水口，實際上亦有助排出熱氣。佢需要配上專用嘅濾紙或濾布使用，濾紙材質較厚，所以過濾出嘅咖啡會更加乾淨！要注意Chemex沖煮需時較長，最好用粗少少嘅咖啡粉沖煮！
Photo by Tyler Nix from Unsplash
⑤ GEM Series Coffee Dripper
Photo from Urban Coffee Roaster
由World Brewers Cup冠軍Stefanos Domatiotis研發嘅呢款濾杯從外觀上就已經與別不同，濾杯就好似一粒鑽石，由六角形嘅杯身同埋杯蓋組成。呢個杯蓋並唔會完全覆蓋濾杯，正中間留有一個注水孔，沖煮時可以沿住注水孔嘅範圍加入熱水，防止水直接接觸到濾紙，仲可以保持濾杯內嘅溫度。
而GEM濾杯入面就以兩行平行排列嘅坑紋幫助導氣，底部亦有直線紋路加快流速，整體設計可以將咖啡豆嘅風味萃取到極致。無論係入門定追求完整風味嘅你都好適合用呢款大師級濾杯！
Photo from Urban Coffee Roaster
Urban Coffee Roaster --- GEM Series Coffee Dripper ($348)
⑥ Kalita Wave
Photo by Nathan Dumlao from Unsplash
呢種濾杯同上幾款濾杯喺形狀上截然不同，細細個嘅平底設計加上波浪形濾紙，令到好多人都稱佢為蛋糕模濾杯。
佢嘅原理係以凹凸不平嘅波浪形濾紙承載咖啡粉，加入水之後咖啡粉團會沖入濾紙嘅空隙形成粉壁，就好似一般錐形濾杯咁形成萃取層。因為濾杯係平底設計，流速相對較慢亦可以保持均勻萃取，沖煮出嘅咖啡味道會非常平衡，穩定性比一般錐形濾杯高。想咖啡風味一致嘅你就要試下Kalita Wave啦！
Photo Maria Orlova from Pexels
⑦ 更多咖啡文章
我地eCup website仲有更多以咖啡為題材嘅文章，想了解更多有關精品咖啡嘅知識或者本地嘅特色小店，就click下面嘅link或者去我地嘅website睇多啲啦！
＞＞＞①【香港咖啡烘焙】Red Meow Coffee 炒豆辛酸史 | 拍賣咖啡豆 | 推薦沖煮教學😍！ ①＜＜＜
＞＞＞②【咖啡攻略】5種簡易家用沖煮方法！懶人包教你點樣WFH喺屋企都沖到好咖啡！②＜＜＜
＞＞＞③【咖啡小知識】咖啡與它們的產地，地理環境點樣塑造咖啡豆嘅風味③＜＜＜
