☆咖啡與它們的產地，地理環境點樣塑造咖啡豆嘅風味？☆

咖啡豆嘅風味五花八門，唔知大家有冇留意過咖啡豆包裝上面嘅風味描述呢？美國精品咖啡協會(SCAA)同World Coffee Research合作制定左一套「咖啡風味輪」，上面嘅分類密密麻麻，令人好奇點解咖啡嘅味道可以出現咁多種變化！

實際上無論係咖啡豆嘅品種、處理法，定咖啡師嘅沖調方法，都會令咖啡豆呈現出唔同風味。而今次我地會介紹產地嘅地理環境同咖啡豆風味嘅關係！

●　氣候

Photo by IG >@kokoroasters<

絕大部分自然生長嘅咖啡樹都分佈喺赤道附近，喺「咖啡帶 (Coffee Belt；南緯30度至北緯30度)」之間嘅熱帶至亞熱帶地區生長。呢類地區四季同日夜溫差範圍比較穩定，為咖啡樹提供舒適嘅氣溫。

由於咖啡樹對溫度變化非常敏感，如果氣溫太極端有機會令葉片枯萎甚至整棵死亡；而四季分明、降雨量集中於特定季節嘅氣候特色為咖啡樹確保足夠水分生長，並有助農民喺旱季採取咖啡果實。

Photo by Rodrigo Flores on Unsplash

呢啲合適嘅氣候條件係咖啡樹生長嘅最重要一環，如果種喺唔合適嘅地區，咖啡豆就冇可能生存到，而氣候嘅優劣亦決定咖啡豆成豆嘅質素。

喺最理想嘅栽種環境當然可以令咖啡果實吸收嘅養份最大化，而雨量過多或溫差太大都係影響咖啡生長嘅因素。

所以氣候絕對係咖啡成長嘅第一大重點，亦都初步決定咖啡嘅風味(生長得唔好自然味道會有瑕疵)，而其他環境因素就進一步建立咖啡豆嘅特性同韻味，我地會喺之後嘅文章詳細介紹！

●　土壤

Photo by Christian Joudrey on Unsplash

咖啡豆風味嘅關鍵在於生長過程間吸收嘅養份。從土壤中得到嘅有機物質以及礦物質會決定咖啡豆成熟後嘅味道，如果土壤養份含量充足，嗰個地區收成嘅咖啡豆風味會突出；相反，土壤唔夠養份就會令咖啡豆出現萎縮、大小不一等成長不良情況。

泥土嘅pH值都係一個重要指標。咖啡樹較適合栽種喺酸性嘅土壤，而精品咖啡最常用嘅阿拉比卡(Arabica)咖啡最理想嘅土壤pH值介乎喺6至6.5之間。合適嘅酸鹼度有助咖啡樹吸收礦物質，否則咖啡樹有機會生長不良，或者咖啡豆嘅風味會混雜異味！

另外，礦物質種類多寡亦影響風味嘅變化。泥土中鉀、鈉、磷等礦物質以及其他微量元素會被咖啡樹吸收，發展出咖啡豆嘅酸度、調性等風味元素。正因為咁，大部分出產優質咖啡豆嘅產地土壤都以火山灰土(volcanic soil)為主，呢種土壤養份充足、疏水性優秀，令呢啲產地出產嘅豆風味更多元化同突出。同時因應土壤嘅特性同養份比例嘅唔同，咖啡豆會展現出唔同嘅風味特色。

●　海拔

Photo by Clint McKoy on Unsplash

可能大家喺咖啡豆包裝嘅資訊欄都見過上面列出產地海拔，而你有冇諗過點解呢！種高啲會好飲啲？定係純粹高海拔出品會矜貴啲所以可以賣貴啲？原來呢項資料同咖啡豆嘅風味構成息息相關！

咖啡樹喺較低溫度下生長速度會較慢，藉此可以吸收更多土壤入面嘅養份，令咖啡豆風味更醇厚；但咖啡樹對氣候有一定條件，唔適合栽種喺「咖啡帶」以外嘅地區。高海拔提供較低氣溫，同時較少其他植被，令咖啡樹可以確保充足養份、日照同埋水分，加上熱帶地區嘅氣候條件，絕對係咖啡樹生長嘅最佳環境！而唔同海拔嘅地區自然會形成咗唔同生長條件，令咖啡豆嘅風味塑造出地區特色！

●　更多咖啡文章

我地eCup website仲有更多以咖啡為題材嘅文章，想了解更多有關精品咖啡嘅知識或者本地嘅特色小店，就click下面嘅link或者去我地嘅website睇多啲啦！

＞＞＞①【新興咖啡沖煮法】好睇又好飲！超人氣虹吸咖啡介紹~①＜＜＜

＞＞＞②咖啡研磨度的重要性②＜＜＜

＞＞＞③5間精選人氣海外咖啡豆烘焙推介🔥③＜＜＜

＞＞＞✦ 小編推薦文章-- 教您使用SCAA咖啡風味輪-中文翻譯版下載 | Origin Kaffa 咖法森林✦＜＜＜