【經驗分享】開咖啡店有咩要知？｜開咖啡店心得Q&A系列(二)｜Gary @ Urban Coffee Roaster
「"Quality does matter"，我哋覺得客人整體experience先係最重要，佢可以嚟到飲到一杯好好飲嘅精品咖啡，同時都可以食到好好食嘅野食，先係一個完整嘅體驗。」
相信咖啡迷對Urban Coffee Roaster都唔會太陌生，喺開咖啡店心得Q&A系列嘅第二彈我哋訪問咗UCR嘅Gary。目前UCR有尖沙咀、將軍澳同銅鑼灣三間分店，仲喺大角咀有炒豆房嫁！但原來一開始UCR係喺木頭車賣左一段時間咖啡再正式開第一間位於太子嘅咖啡店，佢經驗咁豐富，一齊嚟睇下Gary喺開咖啡店呢方面有咩心得同中伏位分享啦！
＃籌備
籌備要用幾耐？
木頭車
其實第一次出嚟賣咖啡係進駐深水埗青年旅店Wontonmeen一樓嘅時候，當時係一個好倉促嘅決定，用左兩三日都決定好。然後只係以木頭車嘅形式做咗4個月左右，偶爾會去市集賣下咖啡豆，都未係正式咁營運咖啡店。
第一間店
後來真正開嘅第一間店喺太子，由構思到裝修同買準備好儀器，大概用咗兩至三個月，而當時都已經係好幾年前嘅事。
依家開分店
依家開分店嘅話，因為想每一間店都有獨特之處，喺構思上就要花更多心思，大概需要半年時間籌備。
要用幾多錢？
第一間店
因為幾年前精品咖啡喺香港並唔流行，所以最初開太子店嘅時候都比較保守，所投入嘅資金其實好少，前前後後大概20-30萬左右。雖然想慳錢，但因為覺得客人入咖啡店嘅體驗除咗味覺之外，環境同感覺都好重要，所以好多飾面上嘅野都會自己落手做，務求親手做到自己滿意嘅效果，例如買一舊木返嚟自己打磨。租金方面都揀好平租嘅店舖，器材會喺二手市場搵啲高質素嘅咖啡機。
依家開分店
而依家咖啡店多咗好多，客人要求亦都高咗唔少，除咗咖啡要好飲，有人會想店舖裝修得靚去打卡，租金相比起以前貴咗，所以依家籌備一間店要100萬左右。
建議
如果想對開店有個更清晰嘅預算，你可以預大概千幾蚊一尺。
租鋪
喺租金方面，如果你預算比較少，想搵平租嘅地方，一定要謹慎，平嘅位自然會有佢平嘅原因。
牌佬
有啲鋪可能喺結構上會有小小問題（例如僭建），有可能令你好難申請牌照，所以喺出牌之前一定要留一個牌佬幫你檢查清楚。
電力
要留意下店鋪可以供應嘅電力夠唔夠，因為咖啡機、冷氣、雪櫃等等都相對耗電，有時可能想做埋小食需要加熱，而依家其實好多店都未必提供到足夠電力比你營運咖啡店。
請人難唔難？
依家香港咖啡店多咗，所以對咖啡師需求亦大咗，變相依家要請咖啡師或者廚師係難咗好多。
最近咖啡師行情如何？
最近咖啡店多咗，令咖啡師呢個職業嘅可持續性高咗，對咖啡師嚟講係一件好事。
感悟
最近有個感悟，覺得其實咖啡師條路好窄，但咖啡師實際上要識嘅嘢其實好多。
好多咖啡師可能只想專注喺咖啡嘅工作上，覺得賣太多野食就係餐廳而唔係咖啡店，咁佢哋可能去到senior嘅時候career path就會到達樽頸位。
其實咖啡師同咖啡店之間有個因果循環，如果咖啡師識更多嘢可以更好咁管理店舖，咖啡店就可以做得更好從而有更多利潤，令咖啡師更容易得到同佢地所擁有嘅知識量相對應嘅酬勞。
二手機器係唔錯嘅選擇
籌備太子店嘅時候因為想慳錢所以我哋盡量搵好嘅二手咖啡機，甚至我哋會搵國外嘅網站，因為國外咖啡文化流行咗好耐，二手咖啡機會比較多。其實二手機器理論上如果冇壞嘅話係唔會對出嚟嘅品質有影響，而我哋都務求將品質睇得最重要，所以寧願買一個性能高嘅但係二手嘅機器。所以如果想開店嘅話，二手機器其實係唔錯嘅選擇。
＃磨豆機介紹
相比起咖啡機，磨豆機更重要。市面上咖啡機價錢可以相差好大，由幾萬至二三十萬，對於咖啡機大家比較關心嘅係穩定性，但一般嚟講大牌子都可以提供到好好嘅穩定性，性能其實大相逕庭。但磨豆機嘅好壞可以直接影響咖啡嘅質素，所以比較建議將資源投放落好嘅磨豆機到。
EK43
我比較推介EK43，EK43係咖啡比賽都會用嘅磨豆機，可以更均勻咁萃取，雖然使用上比起其他磨豆機更麻煩，但佢可以更好咁控制咖啡嘅質素，長遠嚟講值得入手。
>>參考網頁<<
＃定位
「"Quality does matter"，我哋覺得客人整體experience先係最重要，佢可以嚟到飲到一杯好好飲嘅精品咖啡，同時都可以食到好好食嘅野食，先係一個完整嘅體驗。」
我哋除咗想專注做精品咖啡，同時都想兼顧做好食物。幾年前其實好多咖啡店或者咖啡師會好抗拒賣野食，我哋覺得客人整體experience先係最重要，佢可以嚟到飲到一杯好好嘅精品咖啡，同時都可以食到好好食嘅野食，先係一個完整嘅體驗，而做野食唔係為咗賣貴啲賺到錢咁簡單，而係本身件野食好食係會令到客人對你嘅店舖有信心，令佢哋覺得你係著重質素嘅一個品牌，所以我哋一直都將品質放喺最高嘅位置。
令手沖咖啡有更多人認識
所以，即使係新創業嘅咖啡店，如果係鍾意做嘅話就唔好太局限自己淨係做某一類型，因為做好食嘅野食除左會令公司賺錢以外其實都可以令手沖咖啡有更多人認識。依家大部分人都會嚟問你有冇野食，如果冇嘅話客人可能會話食埋嘢再過嚟或者就咁算，所以如果淨係做咖啡有機會會流失左好多客。
＃炒豆先定開店先？
工場成本較高，雖然基本設備可以十萬內就有，但長遠嚟講需要不停升級技術同硬件，亦要購買大量咖啡豆，較難回本。另一方面，如果開工場先嘅話會較難宣傳，受眾有所限制，相比起開店更難將咖啡豆售出。
相反，如果先開店，客人就會更容易對品牌有印象，亦相比起工場更容易接觸客人，先開店再開工場就可以更容易將自家豆推出。
＃最後有咩建議比想開咖啡店嘅人？
開店前一定要構思好品牌定位同形象，品牌唔單止係一間店、一件產品或者一杯咖啡，如果可以豐富品牌，除左可以令更多人認識你嘅品牌，亦都可以令客人對你更有信心。其實有時做品牌杯、t-shirt嗰啲好大機會唔會賺到錢，但可以支撐到你嘅品牌，推動自己做得更好。
本篇內容在訪問後進行了多次整理，資料僅供參考，如有不足的地方，請多多包涵。
想創業開咖啡店但喺開戶口上有困難？
即刻睇睇eCup為你爭取嘅專屬開戶優惠！>>>開銀行戶口優惠<<<
開戶後如果想招聘人手，歡迎前往 >>>咖啡店職缺<<< 留低你嘅招聘訊息。
繼續睇 開咖啡店心得Q&A系列 其他文章：
