【香港人本地啡】本地烘焙香港咖啡豆！精選10間香港自家炒豆Roasters (上)
近年香港咖啡店百花齊放，港九新界各區都有唔同特色嘅小店。同時消費者對咖啡嘅質素要求都更高，除咗講究豆嘅來源，亦都對豆嘅新鮮度有好高要求。
唔少小店憑自家本地烘焙嘅咖啡豆殺出重圍，提供最新鮮嘅優質咖啡豆，受盡愛啡之人嘅青睞。
香港人當然要大力支持下本地出品嘅咖啡，我們精選咗10間本地Roasters嚟介紹，會分成上下兩部分，快啲入嚟睇下啦！
① Coffee Slave
上一次我地有介紹過Coffee Slave喺荃灣嘅實體店，今次就集中講講「啡奴」嘅豆！佢哋專門搜羅各地單品豆，喺自家工場炒豆，再分別為各款單品豆推出原豆同埋掛耳包，方便唔同客人。
最重要係Coffee Slave每個月都會更新豆單，保證每期咖啡豆都係新鮮出品，想買豆亦都唔怕嚟嚟去去都得幾款選擇冇得揀。
Coffee Slave唔止賣豆，仲有舉辦SCA(精品咖啡師協會)嘅專業咖啡證書課程同埋其他較Casual嘅Workshop，無論係想入門初學沖咖啡，定打算深造沖煮咖啡挑戰證書，都可以揀到適合自己程度嘅課程參加！
② Coffee Justice 珈啡公義
無論你嘅身份係點，即使只可以出一分微力，都應該幫助守護公義。而Coffee Justice嘅目標就係將更公平嘅咖啡交易帶入香港。佢地嘅宗旨係將符合公平貿易，能夠保護咖啡農權益嘅交易媒道帶入消費者目光，就算係買咖啡豆都可以揀更加公正嘅渠道幫助農民！
Coffee Justice選用非洲坦桑尼亞吉力馬札羅雪山(Kilimanjaro)嘅AA級咖啡豆，並不經中介直接向當地農民購入生豆，更透過Tanzania Dream Project (TDP)保障咖啡農得到公平貿易環境，同時提供助學機會，確保能夠持續支持咖啡農，實踐消費公義。
佢地非黑即白嘅包裝配色，以及包裝上嘅字樣，完全呼應到佢地捍衛公義嘅理念。而佢地嘅產品主要分深焙以及中度烘焙兩款豆，同一款豆兩種唔同風味，絕對值得一試！
③ Aster Roaster
一杯咖啡呈現出嘅風味會根據烘焙度深淺而有所變化，但坊間有售嘅咖啡豆種類有限，未必完全滿足到你想要嘅味道。Aster Roaster嘅店主為咗追求富有層次、酸度較低嘅風味，決定從各地引入咖啡生豆，自家烘焙出最理想嘅咖啡豆。
Aster Roaster嘅烘焙風格集中喺淺中烘同中深烘之間，一方面避免出現淺焙咖啡豆嘅突出酸味，同時減少深烘豆嘅焦苦味，做出更完整嘅層次。
而Aster Roaster用台灣出產嘅近紅外線烘焙機烘豆，以穿越式熱力將熱源直接傳至咖啡豆芯，令受熱更均勻避免豆身烘燶，保持乾淨嘅風味！Aster店主精選咗幾款特別口味，包括哥倫比亞Pink Bourbon，帶有糖果嘅甜味同橙香，鍾意探索新口味嘅你點可以錯過？
④ Sinbad Coffee Roaster
2014年開業嘅Sinbad Coffee Roaster主打小批次烘焙，堅持以人手操作烘豆過程，更方便維持咖啡豆品質一致。佢地希望將咖啡豆產地等資訊透明化，務求買家清楚了解每一款豆嘅來歷同特色，加上對品質嘅嚴格監控，令Sinbad出品嘅咖啡豆成為唔少咖啡迷嘅心頭好。
Sinbad嘅產品包裝亦極具特色，唔只以產地地圖作為設計嘅一部分，角落更加有唔同海洋生物嘅插畫，呼應Sinbad水手風格嘅品牌形象。
除咗來自各地嘅單品豆之外，Sinbad亦有提供幾款Blend豆，有啲地區連小編都未聽過佢地有出產咖啡豆！如果追求品質同想得到驚喜嘅話，就試下Sinbad嘅豆啦！
⑤ Kim Coffee Roaster
從咖啡原豆到帶有深邃顏色同油亮光澤嘅熟豆，當中每一個步驟同細節都講求咖啡師嘅專注以及技術，Kim Coffee Roaster嘅店主將烘焙咖啡豆同黑白攝影作比較：將影像呈現於觀眾眼前，當中亦要經過各種步驟，例如沖洗菲林、放大、投射影像，先可以得到一張有質感嘅相片。
落足心機烘焙，為顧客提供有質素嘅精品咖啡，就係Kim Coffee Roaster嘅宗旨。
Kim Coffee Roaster亦堅持直接從咖啡莊園採購原豆，一方面能夠控制咖啡豆質量，而直接交易亦可以確保莊園同咖啡農能夠直接受惠，避免被中介等因素影響收入。佢地主打南美及中美洲各產地嘅咖啡豆，鍾意呢幾個產地嘅話就去Kim Coffee Roaster揀下豆啦！
未完待續⋯
記得follow eCup緊貼最新咖啡文章及資訊！
⑥ 更多咖啡文章
我地eCup website仲有更多以咖啡為題材嘅文章，想了解更多有關精品咖啡嘅知識或者本地嘅特色小店，就click下面嘅link或者去我地嘅website睇多啲啦！
＞＞＞① 大埔Cafe | CoCo Espresso大埔新分店| 必試特製咖啡果糖漿+冰濾咖啡！ ①＜＜＜
＞＞＞②【荃灣好去處】南豐紗廠 | KOKO咖啡豆烘焙體驗工作坊②＜＜＜
＞＞＞③【觀塘Cafe推介】海濱Cafe | 工業區小店 | 本地烘焙 5間觀塘必去特色咖啡店介紹③＜＜＜
