【香港人本地啡】本地烘焙咖啡豆！精選10間香港自家炒豆Roasters (下)

近年香港咖啡店百花齊放，港九新界各區都有唔同特色嘅小店。同時消費者對咖啡嘅質素要求都更高，除咗講究豆嘅來源，亦都對豆嘅新鮮度有好高要求。

唔少小店憑自家本地烘焙嘅咖啡豆殺出重圍，提供最新鮮嘅優質咖啡豆，受盡愛啡之人嘅青睞。

香港人當然要大力支持下本地出品嘅咖啡，上次介紹咗五間Roasters，今次再俾多五間優質選擇大家，快啲睇下邊間啱你心水啦！

① Fairtaste 細味公平

Fairtaste細味公平，店名已經簡單直白咁帶出咗佢地嘅理念：將優質而合乎公平貿易原則嘅咖啡豆帶俾消費者。Fairtaste直接從各個發展中國家嘅小農購入咖啡生豆，每一款咖啡豆都獲得有機以及公平質易認證，為客人提供有認受性並公開透明嘅渠道。

而咖啡豆品質方面，Fairtaste細選各地精品咖啡級別嘅阿拉比卡咖啡豆，加上本地烘焙確保新鮮度，喺味道同質量上絕對係一等一。如果你希望為咖啡產品同咖啡農出一份力嘅話，可以試下Fairtaste出品嘅產品！

② Number 9

Number 9係一間位於尖東嘅樓上咖啡店，但佢地有自設炒豆工房新鮮烘焙咖啡豆，質素絕對唔差！佢地嘅包裝行簡約風，純白色袋身加上簡單Logo，另外不時推出嘅Box Set以木盒包裝，作為禮品亦非常適合。

Number 9搜羅各地唔同莊園嘅咖啡豆，最近新一批豆選自厄瓜多爾，將同一莊園三種不同品種嘅原豆烘焙，俾客人有更多選擇。除咗定期更新嘅豆單，亦有不時推出custom lot咖啡豆，對喜愛嘗試新豆嘅你係最佳選擇！

③ DS Studio Coffee Roaster

我地上一次有介紹過位於觀塘嘅小店Lobby Cafe，而DS Studio就係營運Lobby Cafe嘅公司，主要以”From Farm to Cup”理念經營精品咖啡業務，佢地從各地莊園以及農民直接買入咖啡豆，保證生產者得到合理回報，亦投入資源開設咖啡店以及提供培訓。

而DS Studio嘅產品最大特色當然係多樣性，佢地有來自各地各個產區嘅原豆，包括少見嘅雲南產咖啡豆以及幾款拼配豆以及茶葉，今期更加新推出冷泡咖啡包，以帶有葡萄乾同紅酒香氣嘅雲南咖啡豆製成，啱曬大熱天時喺屋企整Cold Brew！

④ Starting Over Espresso

Starting Over Espresso店名相當直白，從一杯咖啡開始重新出發，就係佢地嘅理念同原點。Starting Over本店坐落於中環，深藍色門框點綴純白牆身，盡顯英倫風氣息。店主希望以舒適嘅環境為客人提供最好嘅服務，當然對店內選用嘅咖啡豆亦非常講究，從House Blend到其他單品豆都係由店主親自挑選以及烘焙，更加開始零售咖啡豆，將優質咖啡豆帶俾更多顧客。

Starting Over嘅豆會由店主根據唔同季節決定烘焙度，亦會配合各個產地咖啡豆嘅風味特色，調整出最理想嘅味道。除咗單品豆，佢地嘅SOE Blend亦都值得一試，呢款獨家拼配豆帶有花香以及莓果風味，精選來自埃塞俄比亞以及巴西嘅原豆，相信鍾意中度烘焙嘅你都會鍾意佢地嘅SOE Blend！

⑤ Kizuna Roaster & Co.

希望創造出一個以咖啡匯聚大眾嘅地方，呢個就係Kizuna Roaster嘅起點；正因為咁，佢地採用日文入面代表人同人之間連繫嘅漢字 --「絆 Kizuna」作為店名。當然佢地嘅目標唔只連繫顧客，更加要連繫出產咖啡豆嘅咖啡農，Kizuna會盡量從咖啡農或當地處理廠直接買入原豆，確保生產者權益唔會被中介剝削。

Kizuna Roaster所推出嘅咖啡豆好有特色，最近嘅About Time Blend係一款深烘豆，但客人可以從三個烘焙時長揀一個，體驗同一款豆同一種烘焙度所呈現出唔同嘅風味。先前亦推出過唔少獨特嘅咖啡豆，例如以經雪藏嘅咖啡果實做出嘅咖啡豆。更加會定時同本地Coffee Shop合作做咖啡cupping活動，有興趣就去佢地IG留意下相關資訊啦！