日式禪社風格咖啡室 - Kaffee Jen

位於屯門嘅Kaffen Jen 係一間日式禪社風格嘅咖啡室。夫妻店主Karen 同 Joe 有二十幾年喺日本工作同旅遊嘅經驗，鍾情於遊覽日本嘅郊區同禪社，深深俾佢哋教人沉澱身心靈嘅文化影響。所以佢哋希望將日本禪修風氣加埋咖啡文化帶翻香港。 佢哋亦都希望咖啡店可以為客人帶嚟家嘅感覺，令大家可以喺繁忙嘅都市生活中放慢腳步。

1. Logo & Naming

咖啡室Kaffee Jen改名嘅靈感係由兩位店主嘅英文名 – “Karen” 同 “Joe” 加上咖啡禪意嘅英文 “Coffee Zen” 而嚟。而Logo 亦都合併咗二人嘅元素。Karen希望喺Logo 帶出二人經營鋪頭所投放一點一滴嘅心血；Joe就希望喺Logo 呈現出日式禪修嘅理念。最後將兩個元素合併就形成宜家大家見到Kaffee Jen嘅Logo！

2. Zen themed decor

連個店名都有Zen嘅元素，店內環境當然唔會令大家失望啦。

兩位店主由用料到整體設計都親力親為，只係為求更貼近日本禪社令人放鬆嘅環境。店內地板用料就選用咗石材，務求加強店面整體質感。特色牆就係經過火燒至炭嘅木材，令到牆上木紋更加明顯。

 

3. Japanese elements

頭先講到店主曾經有二十幾年身處喺日本工作同埋旅遊，二人影埋嘅日本靚相當然就唔少得。

店內放置咗一部投影機，將店主自己影嘅日本風景相投影喺牆上面。客人除咗可以喺疫情底下有置身喺日本旅遊嘅感覺外，仲可以Scan一下店主喺相嘅下角加上嘅一個Google Map Qr Code睇下個位置係邊度。去過同一個地方嘅可以不妨同店主分享一下，希望可以引起大家嘅共鳴啦！

下次大家去到Kaffee Jen 嘆啡嘅時候不妨多加留意一下咖啡室從店名到環境所帶出嘅禪意！

4. Coffee (aka Kaffee)

去到咖啡室當然唔可以少得嘆杯靚咖啡，Kaffen Jen 嘅咖啡從原材料到沖煮方法都好講究。後段更加會同大家推介翻一杯 Kaffee Jen Signature，記住睇埋落去啦！

日本嘅咖啡文化傾向深度同炭燒烘焙，所以落口嘅甘苦味會比較重。而店主正正考慮到唔少香港咖啡迷會飲唔慣過於甘苦嘅黑咖啡，由四種南美洲咖啡豆組成嘅「Kaffee」Espresso base 會有日系煙燻 同黑朱古力後調，落口並不會過甘，反而更加順口。啱曬用嚟滿足各位嘅咖啡癮。日系煙燻後調加埋奶之後，層次會更加分明，更加飲得出「Kaffee」獨有嘅日式黑朱古力風味。

6. Iced signature Kaffee drink for Summer

最後同大家推薦一下店鋪手作咖啡嘅Signature – 手作檸檬咖啡

「Kaffee」Double Espresso再加上店長嘅手工糖漬檸檬汁就係手作檸檬咖啡嘅靈魂。店長每次會將二十幾個檸檬糖漬至少四日。糖漬過後嘅檸檬香氣和甜感會被釋放出嚟，每杯手作檸檬咖啡都會配上一片糖漬檸檬，片糖漬檸檬喺比客人享用之前會俾店員再用火槍燒一下，令到表面焦糖化。唔少客人吃完片檸檬後都再問有無得單賣。

大家不妨去Kaffee Jen 嘆返杯檸啡，保證連最後一滴都會有啡味，唔會俾檸檬整淡，為大家帶嚟清爽同清甜感。