☆好睇又好飲！超人氣虹吸咖啡介紹☆

沖煮咖啡嘅方法稱得上五花八門，從最常見Coffee Shop嘅義式濃縮Espresso，到有唔少精品咖啡店提供嘅手沖法，甚至大家喺屋企撳個掣就自動完成嘅Capsule同即溶咖啡，都各有特色，亦各自能夠帶出唔同嘅咖啡風味。

今次小編想為大家介紹下喺日本同台灣牽起風潮，最近香港開始興起嘅虹吸式咖啡Siphon！

① 原理

Photo by Adobe Stock

虹吸咖啡嘅運作原理比其他沖煮方式更加獨特，平時手沖或Espresso咖啡機都係直接喺咖啡粉上面注水過濾，但虹吸咖啡所使用嘅方法先將咖啡粉浸泡，之後再經濾芯作過濾！

因為虹吸咖啡壺有分上下兩層，同時內部採用密封設計，加熱後嘅水會增加氣壓，將熱水推上上層，降溫後又會流返落下層。虹吸咖啡就係用呢個原理將熱水維持喺上層一段時間，先浸泡咖啡，再喺降溫後經濾芯過濾，令咖啡風味比其他沖煮方式更圓潤~

② 器材

Photo by IG >>@lazzyprojecthk<<

虹吸咖啡所需嘅器材唔算好多，有虹吸壺本體（上壺&下壺）、濾芯（通常以法蘭絨濾布作為濾芯）、用作攬拌嘅木棒，同埋熱源（酒精燈或專用加熱器）。但組裝起嘅虹吸咖啡壺都幾佔空間，所以唔太適合家用。

值得一提嘅係虹吸咖啡所用嘅濾芯並唔係常見於手沖咖啡嘅濾紙，而係可重用但需要花工夫清洗保養嘅法蘭絨濾布。濾布相比濾紙更能夠保留更多咖啡中嘅油脂，成品會更為醇厚；但濾布使用上的確比較唔方便，需要頻繁清洗先可以確保咖啡風味唔受影響。兩者嘅優劣相當明顯，唔知你又鍾意邊種過濾法呢？

③ 過程

Photo by IG >>@bhood.hk - Barista Jeffrey Wu @wo0ss<<

虹吸咖啡儀器分上下兩段，一開始會將水注入下層，之後直接打開熱源將水煮滾。呢個時候下層嘅熱水會蒸發成水蒸氣，令壺入面嘅氣壓上升，推動熱水通過濾布到上層，接觸咖啡粉開始萃取過程。

熱水會浸泡咖啡粉一段時間，當移開熱源嘅時間，下層嘅氣壓降低，令萃取完嘅咖啡經濾芯過濾至下層，完成整個沖煮過程。虹吸咖啡嘅萃取時間只需45至1分鐘，同時沖煮嘅過程喺視覺上亦非常美觀，所以成為唔少咖啡迷嘅最愛！

④ 特點

Photo by IG >>@chartcoffee<<

虹吸咖啡喺沖煮過程持續加熱，將水溫維持比手沖更高，近100度嘅溫度，所以萃取時間亦相對較短；加上以氣壓推動嘅原理同法蘭絨材質濾布，令虹吸咖啡能夠將咖啡豆嘅精華全數保留。

另一大特色當然係虹吸咖啡嘅視覺效果啦！睇住下層嘅熱水好似違反地心吸力咁向上流，然後經咖啡師均衡攪拌之後，流返落嚟就變成琥珀色嘅咖啡，小編第一次見到真係覺得好神奇！各位如果入到咖啡店見到Siphon器材嘅話，不妨叫返杯嚟試下！

⑤ 更多咖啡文章

我地eCup website仲有更多以咖啡為題材嘅文章，想了解更多有關精品咖啡嘅知識或者本地嘅特色小店，就click下面嘅link或者去我地嘅website睇多啲啦！

＞＞＞①【自家製冬日咖啡】4款冬日限定咖啡介紹，喺屋企嘆住渡過寒冬！①＜＜＜

＞＞＞②咖啡入門 | 濃縮咖啡與手沖的分別②＜＜＜

＞＞＞③【屯門禪系咖啡室】屯門全新日式禪系咖啡店 - Kaffee Jen③＜＜＜