4款冬日限定咖啡介紹❄️

最近氣溫開始變凍，相信大家同小編一樣都唔想離開溫暖嘅床同被竇，更加冇諗過行出門口架啦！
今次我地精選咗充滿冬日特色嘅咖啡飲品，仲有食譜可以俾大家喺屋企沖一杯暖入心嘅咖啡❤️

① Butterscotch Coffee (奶油糖咖啡)

Photo by IG >>@awaitcafestudio<<

Butterscotch係一種帶有煙燻風味嘅咸味糖果，市面上亦有butterscotch糖漿，喺大型超市可以搵到；想喺屋企整嘅話，可以將牛油加熱，再加入黃糖同少量鹽，邊攪拌邊倒入忌廉，最後落少少雲呢嗱精油就完成！

至於butterscotch coffee就另外需要少量肉桂粉，將全部材料攬勻之後倒入熱黑咖啡，最後喺面加鮮忌廉就可以飲啦~ 呢款咖啡會有拖肥糖嘅味道，再以咖啡嘅苦味同肉桂嘅辛辣中和甜味，令味道平衡，好適合鍾意甜咖啡嘅你！

推薦食譜: Butterscotch Coffee by Living Locurto

② Gingerbread Latte

Photo by IG >>@lattercafehk<<

薑汁一向都係冬天禦寒嘅法寶，食湯圓嘅薑茶底、甜品舖嘅薑汁撞奶，相信各位都試過！但你又有冇諗過咖啡加薑會係咩味呢？

以薑做材料嘅咖啡喺國外好受歡迎，呢款gingerbread latte以薑餅作為原型，將薑末同肉桂、豆蔻等香料混合，加上糖蜜、熱鮮奶同咖啡，就得到一杯充滿香氣、帶有一絲絲甜味同香辛嘅暖胃咖啡！

推薦食譜: Gingerbread Latte by Coffee Affection

③ Irish Coffee (愛爾蘭咖啡)

Photo by IG >>@handsoncoffee<<

Irish Coffee係外國經典咖啡飲品，唔少家庭或餐廳都會喺宴會最後以Irish Coffee收尾。佢嘅做法簡單，唔需要太多材料同繁複嘅步驟，但做出黎嘅味道令人一試難忘！

Irish Coffee最大特色係以愛爾蘭威士忌作為點綴，加入少量黃糖/楓糖漿同熱咖啡底，融合出濃郁酒韻以及帶出咖啡豆獨有風味；最上層嘅打發忌廉再為飲品增添綿密口感同奶香。香甜可口嘅熱咖啡加上些許酒精，飲完全身都暖笠笠！鍾意咖啡同酒類嘅你千祈唔好錯過！

推薦食譜: Irish Coffee by Cookie and Kate

④ Spiced Cold Brew

Photo by IG >>@maderacafe<<

如果你唔鍾意熱咖啡嘅話，最後呢款可能啱你口味！Spiced Cold Brew係喺正常Cold Brew浸豆嘅過程入面加上香料一同冷泡，令成品增添一份刺激嘅香氣。

做法同材料亦十分簡單，只需要喺正常浸Cold Brew嘅咖啡豆份量之上，加入少量肉桂條、丁香、豆蔻，或者用混合香料包，再加入幾滴雲呢嗱精油，放入雪櫃冷藏12小時就準備好！

推薦食譜: Spiced Cold Brew by Fuss-Free Flavours

⑤ 更多咖啡文章

我地eCup website仲有更多以咖啡為題材嘅文章，想了解更多有關精品咖啡嘅知識或者本地嘅特色小店，就click下面嘅link或者去我地嘅website睇多啲啦！

＞＞＞①【荃灣&葵涌Cafe推介】7間荃灣/葵涌必去特色咖啡店！①＜＜＜

＞＞＞②咖啡豆處理法 — 厭氧②＜＜＜

＞＞＞③寵物可飲用的咖啡 — Puppuccino③＜＜＜