CLEAN坐落喺皇后大道西嘅一角，袖珍嘅舖面配上暖色系配色，店內採用綠色裝潢，營造出復古而溫暖嘅氛圍，店內竟然仲放咗多部洗衣機！

舖頭嘅外觀固然搶眼，吸引唔少人打卡，但CLEAN最特別之處係佢地嘅目標—希望將可持續發展嘅理念融入服務，務求向客人宣揚概念，同時亦親自為環境出一分力。

佢地嘅咖啡同洗衣服務入面每一個細節都可以見到創辦人嘅用心，今次就由小編帶大家了解下CLEAN點樣完美融合理念同服務啦！

.
CLEAN
地址：上環皇后大道西100號地舖
營業時間：Everyday 0800 - 1700
Instagram: @youarecleanhk

1.  嚴選咖啡豆

CLEAN所選用嘅咖啡豆一律合乎雨林聯盟(Rainforest Alliance)認證，代表咖啡豆喺經由公平質易購入，可追溯產地資料，而採收過程能夠將對大自然同生態嘅影響最小化。

除左國外進口咖啡豆，CLEAN亦同本地咖啡烘焙師合作，定期推出獨特嘅單品咖啡豆比客人選擇！

2. 包裝

包裝往往係消費文化入面最大嘅廢棄物來源，而CLEAN嘅熱飲咖啡外帶杯同包裝都係可自然分解嘅物料；而凍飲杯就可以帶返CLEAN舖頭回收和堆肥，減少浪費！
 

3. 洗衣用品

店內6部粉綠色嘅洗衣機唔止外表吸睛，更加內有乾坤！為左減少多餘能源消耗，CLEAN嘅洗衣機以凍水運作，但配合舖頭選用嘅天然、無敏感成分同埋無有毒物質嘅洗滌劑，清潔效果絕對令人滿意。

另外，店內亦可以租用Coraball吸纖維球，防止微纖維嘅吸附同釋放，減少水洗後隨污水排放出大海嘅微纖維量。

4. 植物奶取代鮮奶

講到CLEAN最大特色，一定係佢地以植物奶調配店內所有飲品！為左配合可持續發展嘅理念，CLEAN希望採用對環境影響較少嘅植物奶，取代從畜牧業採收嘅鮮奶。

當然，CLEAN獨家嘅Home Blend配方有針對植物奶嘅風味作出調整，所以咖啡味道絕不遜色！如果客人要求，都可以加$2轉為牛奶咖啡~

★特別推介★

CLEAN嘅menu上亦出現獨特嘅咖啡，例如用椰子水配上Espresso Shot嘅Going Coco，令咖啡帶出一絲清新甘甜嘅風味；亦有Feeling Dirty，喺結凍成冰嘅咖啡上面倒入燕麥奶，為冰咖啡增添清涼而刺激嘅口感。

唔想飲咖啡嘅你都可以選擇芝麻燕麥奶，喺冰涼嘅燕麥奶表面倒入濃香嘅芝麻醬，形成微甜而帶有芝麻香嘅獨特味道，充滿驚喜！

想知道可持續發展理念點樣融入生活，就去CLEAN體驗下啦！

如果想睇多啲本地特色咖啡店推介嘅話，記得留意我地eCup app同website嘅update啦~

＞＞＞①5間新開中西區特色咖啡店介紹☕️①＜＜＜

＞＞＞②屯門全新禪系咖啡店 - Kaffee Jen②＜＜＜