【經驗分享】開咖啡店有咩要知？｜開咖啡店心得Q&A系列 (一)｜Eisen @ OneThird
「做好多嘢都可以好賺錢，唔一定要做咖啡。但做一樣鍾意嘅野只要營運到就足夠。如果你真係鍾意做一樣野，你只會越做越好。」
開咖啡店心得Q&A系列嘅第一彈訪問咗元朗隱世小店OneThird嘅店主Eisen！ Eisen自細有個開咖啡店嘅夢想，累積多年咖啡知識終於喺元朗開咗精品咖啡店，依家OneThird開業就嚟兩年喇，一齊睇下佢有咩關於開咖啡店嘅心得同中伏位分享下啦！
＃籌備
籌備呢間店用左幾耐？
如果係OneThird嘅話大概半年，但由細都大都好想開一間咖啡店，所以成個過程可以話係用咗10年，包括用時間學習有關咖啡嘅知識、去澳洲working holiday學沖咖啡甚至為咗設計自己嘅店而去學建築設計、咖啡烘焙等等……
用左幾多錢？
籌備
所需金額其實同你店舖嘅定位息息相關，如果以bar嘅形式做咖啡店嘅話大約3-40萬，小店形式嘅話大概6-70萬，高成本嘅約100萬內。而且有各方面嘅因素都可以形響你嘅預算，例如租金、器材、裝修等等。
租金
唔同地區有唔同價錢，如果係bar嘅形式最平可以萬5，小店形式人流較少嘅地區2萬5左右，但同樣規模喺商業區例如中環等地區可以上升到十幾萬。
裝修
裝修如果搵設計公司普遍都幾十萬，自己設計所以都慳咗唔少成本。
咖啡器材
其實咖啡器材佔幾多成本視乎你咖啡店嘅定位同想做咩類型嘅咖啡豆。
喺咖啡豆方面唔同質素嘅咖啡豆，成本可以差好遠，用嘅器材都會有唔同。
如果想做更多種類，所需嘅器材就會更多。
市面上咖啡機真係有好多款，有平有貴， 商用咖啡機低至兩萬、高至幾十萬，而磨豆機就由幾千到幾萬都有，主要都係睇你點揀。
建議：
唔好用高階家用咖啡機作商業用途，因為會相對冇咁穩定。當然你都可以選擇唔用咖啡機單做手沖咖啡，咁就可以節省咗一筆成本，但相對地需要有好嘅技術。
開店搞牌照會唔會有困難？
如果係申請大牌會比較繁複，但普遍咖啡店只需要用到小食牌，所以其實都唔太複雜。市面上有好多牌照顧問，如果喺呢方面有困難可以搵牌照顧問，佢地可以幫你處理好所有嘢，大概需要幾萬蚊。
喺比較偏遠嘅地方開咖啡店會唔會有困難?
其實本身香港飲咖啡嘅文化都唔係特別流行，有啲地區甚至好少人會飲咖啡，就好似元朗咁，喺OneThird開業前附近可能得一兩間咖啡店。所以我都花咗時間去調查下元朗人嘅生活節奏同飲食習慣，建議如果想開咖啡店嘅都可以花心思做多啲市場調查。
選址方面如果個地方偏僻嘅話客量就會少，但環境舒適。如果客量多同時環境又好嘅話租金就會比較貴，睇你點揀。
＃其實做呢一行賺唔賺到錢？
其實做好多嘢都可以好賺錢，唔一定要做咖啡。但做一樣鍾意嘅野只要營運到就足夠。我係因為鍾意先做呢行，所以冇諗太多盈利。
香港咖啡店普遍要賺大錢嘅話係難，香港同外國唔同嘅係，香港咖啡文化啱啱先開始發展，而且香港租金成本高、人工低，相反外國相對租金成本低、人工高，而實際上兩者投入喺咖啡豆嘅成本係相約，變相喺香港營運咖啡店會相對困難。喺外國可能一兩個鐘已經賣到幾百杯咖啡，但香港一日賣到百幾杯都算多。
淨係做精品咖啡做唔做得住？
如果你真係鍾意做一樣野，你只會越做越好。就算淨係做一個咖啡bar，只要肯用心都會做得住，先唔好諗要賺大錢。
＃依家咖啡師行情點
其實普遍香港咖啡師入行嘅時候人工大概1萬頭，上到管理層大概2萬幾，相比起外國嚟講係低。以澳洲為例，如果係咖啡師嘅話，一個鐘人工可以有澳幣20-30左右（折合約港幣100-200），但去到香港就可能50蚊左右。
其實依家咖啡店越嚟越多，搵工係唔難，最緊要唔好怕羞，勇敢啲入咖啡店問下佢哋請唔請人。
咖啡店請人會唔會好難？
咖啡店要請人其實都唔算難，依家有好多招聘平台，難嘅係搵到適合一齊工作嘅人。
＃仲有咩tips比想開咖啡店嘅人？
合作伙伴
搵合作伙伴嘅時候要謹慎，唔好將自己所有資產all-in落去。其實開店搵合作伙伴或者員工唔難，但要搵到合適嘅人好睇緣份。
了解更多知識
如果想做好精品咖啡嘅話，最好花多啲時間了解更多有關咖啡嘅知識。
「營運咖啡店並唔係撳個制就出咖啡咁簡單，而係需要大量知識同技術，知識可以學、技術要練。」
OneThird網頁
IG @onethird.coffee
本篇內容在訪問後進行了多次整理，資料僅供參考，如有不足的地方，請多多包涵。
想創業開咖啡店但喺開戶口上有困難？
即刻睇睇eCup為你爭取嘅專屬開戶優惠！>>>開銀行戶口優惠<<<
開戶後如果想招聘人手，歡迎前往 >>>咖啡店職缺<<< 留低你嘅招聘訊息。
繼續睇 開咖啡店心得Q&A系列 其他文章：
