相信Work From Home嘅日子都會持續一段時間，咖啡是不能缺少的，咁在家如何沖到好咖啡？今次我地為大家帶嚟Home Brew Coffee懶人包，介紹幾種簡易咖啡沖煮法同佢哋嘅器具、特點。

每一種沖煮方法同器材都會令咖啡風味有所唔同，以下方法只供參考，因為沖煮方法係層出不窮㗎！希望大家睇完呢篇文之後，可以搵到一款最適合自己嘅工具同方法，喺屋企都可以享受到優質咖啡！

① 手沖(過濾)

相信手沖係大部分人最先接觸亦較常見嘅家用咖啡沖煮法，以濾紙承載咖啡粉，將熱水均勻注入濾杯進行萃取，過程並唔複雜亦唔需要非常貴價嘅器材(當然一分錢一分貨！)，就可以沖出一杯風味乾淨、平衡嘅咖啡！

沖煮步驟:

1. 倒入熱水預熱器材同咖啡杯
2. 將咖啡豆磨至適當粗細度(常見用中等粗細、類似砂糖粒Size)，可自行調整
3. 準備90°C左右熱水，浸濕濾紙洗走紙漿味道，然後倒走沖洗後嘅水

4. 加入咖啡粉(輕輕拍濾杯令咖啡粉表面平整)，先倒入咖啡粉份量兩倍嘅水進行悶蒸30秒：從正中間開始，慢慢以畫圓圈方式向外擴散，要確保全部咖啡粉都接觸到水
5. 30秒後開始第二次注水，維持穩定流速反覆以畫圓方式注水，水柱接近濾杯邊就要向內收，避免直接倒水落杯邊，倒入100g左右熱水後可以暫停

6. 等水位下降到一定程度，再開始第三次注水，水量達到想要嘅萃取量 (水粉比大概1:16) 就可以停
7. 將咖啡倒入咖啡杯就完成！

手沖咖啡對操作手法要求好高，粉水比、水溫、粗細度、注水時間等等，各因素都會影響成品嘅味道同口感！但同時手沖咖啡器材都有不同設計，各有獨特嘅功能去輔助用家，換言之手沖門檻高，但可以靠工具嘅多樣性彌補！例如唔同款式嘅濾杯、濾紙、注水壺…(因為款式實在太多，有機會嘅話我哋會出另一篇文詳細介紹手沖器材！)

② Aeropress

另一款便攜又耐用嘅咖啡器具就係Aeropress啦！Aeropress操作方式亦非常簡單，將熱水注入底座，放入專用濾紙再將壓筒扣上，用力壓到底就可以，原理同French Press相似，可以沖出有飽滿口感嘅咖啡，但相比下Aeropress有更多發揮空間。

沖煮步驟:

1. 準備80-90°C熱水
2. 將咖啡豆磨至適當粗細度(常見用中等粗細、類似砂糖粒Size)，可自行調整
3. 用熱水浸濕圓形濾紙
4. 加入咖啡粉
5. 加入熱水，水位倒到壺身刻上嘅高度
6. 輕輕將咖啡粉同水攪拌

7. 將壓筒放上，準備咖啡杯或其他比較實淨嘅容器
8. 熱水全部壓出就完成！

Aeropress除咗正常沖煮法，仲有「反轉沖煮法」：底座同壓筒倒轉，先將壓筒扣入底座，再從底座底部加入咖啡粉同注入熱水，以浸泡方式萃取咖啡風味，避免部份咖啡因地心吸力而提早流出。最後將濾紙放上底座扣上咖啡杯，成個Aeropress上下倒轉再將濾筒壓到底就完成！追求高自由度又容易上手嘅沖煮方法，不妨試下Aeropress！

③ 摩卡壺 (Moka Pot)

摩卡壺喺香港比較冷門，呢種傳統沖煮法係借熱水沸騰後壓力上升，令熱水穿過咖啡粉層嘅原理運作，沖出嚟嘅咖啡濃度接近Espresso。而Moka Pot需要嘅工具亦相對簡單，只需要加熱爐同埋冷卻用嘅水。

沖煮步驟:

1. 將咖啡豆磨至適當粗細度(比Espresso粗少少、類似鹽粒Size)，可自行調整

2. 將熱水倒入下層
3. 將咖啡粉填入濾層(正中間)，放上摩卡壺然後擰緊上下壺(小心下層熱水會傳熱)
4. 將摩卡壺放到熱源上面，見到氣泡快速噴出、流出嘅咖啡顏色變淡就代表完成
5. 立即將摩卡壺身降溫：下壺放喺水喉下面，用流動水降溫20秒左右
6. 倒出咖啡

要注意Moka Pot接觸熱源太長時間會令咖啡出現燶味，所以最好一開始倒入熱水，縮短煮滾水嘅時間，完成後亦都要將Moka Pot放到流動水源下降溫，就可以提高咖啡品質！

④ 法式濾壓壺 (French Press)

French Press係其中一款操作最簡單嘅沖泡方法，加入熱水等三至四分鐘，慢慢將濾網壓到底，就可以得到一杯醇厚嘅咖啡。

沖煮步驟:

1. 將咖啡豆磨至適當粗細度(粗粒、類似海鹽粒Size)，可自行調整
2. 開始4分鐘計時
3. 倒入咖啡粉，先將熱水倒入均勻浸濕咖啡粉

4. 確保咖啡粉全部浸濕之後，慢慢注入剩餘熱水(注水過程將一分鐘)
5. 倒入足夠嘅水後(常見粉水比1:12)，將上蓋放上
6. 4分鐘後將壓桿慢慢壓落底，完成後即刻倒出咖啡

French Press沖出嚟嘅咖啡可以充分保留咖啡油脂，明確表現咖啡豆本身嘅風味特徵。想令French Press表現更好，可以嘗試加入咖啡粉後先注入咖啡粉兩倍重量嘅水，用木勺輕輕攪拌，等到咖啡粉膨脹之後可入剩底嘅熱水。而時間一到就要即刻倒出咖啡，以免咖啡繼續萃取！

⑤ Espresso咖啡機(自動&手動)

自動咖啡機絕對係最方便嘅一種沖咖啡方法，款式亦五花八門，只需要撳一個掣，等幾分鐘就可以享受一杯咖啡，對生活繁忙嘅香港人嚟講係一大恩物。

沖煮步驟:

1. 放入膠囊
2. 撳掣
3. 完成 :)

而咖啡機亦人卻步嘅原因主要在於價錢同較低自由度：市面上的確有多種口味比用家選擇，但普遍係依照咖啡機運作模式製作出嘅模板化風味，冇辦法保留俾用家自由改變配方、細微調配口味嘅功能。而模擬手沖嘅咖啡機可以確保每次沖煮成品口味一致，但亦都較少空間作出調整！

如果你想搵更經濟嘅選擇，除咗常見嘅手壓Espresso機之外，可以試下WACACO嘅Nanopresso手動咖啡機。佢極袖珍嘅機身可以沖出同Espresso濃度相近嘅咖啡，最重要係全程唔需要用電亦唔洗煮滾水，只要你手動持續撳機身上面嘅加壓泵，就會慢慢萃取出咖啡！

沖煮步驟:

1. 將咖啡豆磨至適當粗細度(Espresso細粉)
2. 將咖啡粉放入上格粉槽，用附近匙羹底面填平同壓實咖啡粉，扣實咖啡粉格
3. 擰開下層熱水格倒入熱水，扣實熱水格
4. 將機身上下倒轉，打開機身加壓泵，準備咖啡杯
5. 開始加壓，咖啡會慢慢從漏口流出
6. 所有熱水用曬就完成啦！

因為Nanopresso機身細部，有超高嘅便攜性，雖然容量變少，只夠沖出一人份量咖啡；但相反憑佢嘅機身尺寸，沖出嘅咖啡可以做出一般義式咖啡機Espresso嘅Crema，真係意想不到！想喺屋企沖Espresso又唔想買咁大部Espresso機，Nanopresso係一個好選擇！

⑥ 更多咖啡文章

我地eCup website仲有更多以咖啡為題材嘅文章，想了解更多有關精品咖啡嘅知識或者本地嘅特色小店，就click下面嘅link或者去我地嘅website睇多啲啦！

＞＞＞①【共享空間 x 精品咖啡？】銅鑼灣自由共享空間 MyBase Brew Lab 介紹！ ①＜＜＜

＞＞＞②【新興咖啡沖煮法】好睇又好飲！超人氣虹吸咖啡介紹~②＜＜＜

＞＞＞③【尖東全新Cafe&Bar】尖東新開必去高質Coffee & Bar 「B’hood」③＜＜＜